FOLGA XERAL ENSINO -9 Marzo

- FOLGA XERAL ENSINO -

 

9 Marzo -2017

 
 
 

 

 

 

FOLGA ENSINO - 9 MARZO-2017

                 

                    

                                   FOLGA ENSINO

9 de MARZO-2017

 

                                    XORNADA DE FOLGA NO ENSINO

A totalidade da comunidade educativa do Estado convocou, para o vindeiro xoves día nove de marzo e en todos os niveis educativos do ensino, unha nova xornada de folga contra a LOMCE. Esta convocatoria vai dirixida á docentes, nais/pais e alumnas/os.

Dende esta Federación de ANPAs, e por medio deste escrito, pretendemos expoñer brevemente cales son as razóns que xustifican a necesidade desta nova convocatoria de folga, mais aínda cando se están a escoitar voces desmobilizadoras que pretenden facernos crer que xa todo esta solucionado.

Aínda a risco de ser repetitivos, pensamos que é importante facer un pequeno análise recordando o que é a LOMCE o que, ao noso entender, representa e as consecuencias que traerá sobre as nosas fillas e fillos. Primeiramente debemos ter claro que se lle chama LOMCE a unha Lei Orgánica auto-nomeada de “Mellora da Calidade Educativa”, lei que se aprobou no ano 2013 para MODIFICAR a LOE (Lei Orgánica 2/2006 de Educación) que aínda é a lei vixente en materia educativa en España. Polo tanto o que fixo a LOMCE foi modificar un importante número de artigos da LOE co obxectivo final de establecer un determinado modelo educativo, destacamos o tantas veces dito pero que nos parece fundamental ter claro: A LOMCE elimina as competencias decisorias dos Consellos Escolares e os converte en meros órganos de consulta e, ademais, establece un procedemento de selección de directoras/es no que a decisión final resérvase para a Administración educativa, por iso dicimos que é unha Lei ANTIDEMOCRÁTICA; a LOMCE eliminou do currículo a “educación para a cidadanía” e estableceu como materia curricular, mesmo no bacharelato, a “relixión católica”, ademais reduciu drasticamente horas curriculares nas “ciencias sociais” (historia, filosofía, etc...) e nas “materias artísticas”, por iso dicimos que é unha Lei IDEOLÓXIZADA; a LOMCE potencia a educación concertada e permite a educación “diferenciada por sexos”, o que vulnera gravemente o dereito fundamental á igualdade consagrado na Constitución Española, por iso dicimos que é unha Lei SEGREGADORA; a LOMCE eliminou as “adaptacións curriculares” do modelo educativo, ferramenta fundamental para a inclusión educativa, establecendo os chamados “programas de mellora” e creando itinerarios temperás, onde alumnado moi xove (13 ou 14 anos) ten que decidir se vai a optar á liña da “excelencia” ou a liña da “formación profesional”, ademais todo isto acompañado dun escandaloso recorte nos recursos educativos de apoio, por iso dicimos que é unha Lei EXCLUINTE; a LOMCE reserva para o Estado a maioría da programación educativa, invadindo claramente as competencias autonómicas en materia curricular, por iso dicimos que é unha Lei CENTRALIZADORA. Como se pode observar con todo isto temos razóns abondas para rexeitar a LOMCE e aínda non se falou das famosas “reválidas”. As “probas finais de avaliación”, como a Lei chama ás reválidas, teñan ou non “efectos académicos” estrutúranse como unha ferramenta fundamental para implementar o modelo educativo deseñado pola LOMCE. Isto é así por ser probas deseñadas polo Goberno central, avaliadas por axentes externos e que terán repercusións nos centros educativos ao establecer ránkings de centros e criterios para a dotación dos recursos, resulta que a mellores resultados, maiores recursos. Xa sabemos que estas probas avalían o nivel de memorización acadado polas alumnas/os dos contidos curriculares establecidos pola LOMCE, os centros non terán mais opción que cinguirse ao currículo LOMCE, o que liquidará a capacidade de establecer os seus proxectos educativos e, polo tanto, liquídase a autonomía docente dos centros e a atención á diversidade.

As consecuencias da implantación da LOMCE son claras, o establecemento final dun MODELO EDUCATIVO NEOLIBERAL que pretende formar a unha maioría social como traballadoras/es e consumidoras/es, con escasa formación persoal e cultural e cunha clara formación técnica moi especializada, maioría social que servirá a un mercado laboral completamente liberalizado como “man de obra barata”. Doutra banda permitirá a unha elite social, que dispón de grandes recursos, formar ás súas fillas e fillos na chamada “educación da excelencia” para continuar sendo elite.

      É ESTE O MODELO EDUCATIVO QUE QUEREMOS PARA AS NOSAS FILLAS E FILLOS?

Porqué é necesario que a comunidade educativa continúe mobilizándose? Como ben recordaredes, na campaña electoral TODOS os partidos políticos, excepto o Partido Popular, PROMETERON DERROGAR A LOMCE canto houbera unha maioría parlamentaria alternativa no Parlamento Español. Hoxe existe esa maioría parlamentaria alternativa, mais a LOMCE continúa VIXENTE e as nosas fillas e fillos xa están sufrindo as perniciosas consecuencias desta lei antidemocrática.

Que é o que realmente se fixo no Parlamento Español? Pois no Parlamento, de momento, non se fixo NADA. O Goberno aprobou o día 9 de decembro pasado un Real Decreto Lei por motivos de urxencia. Esta norma NON pode derrogar a LOMCE e, exclusivamente, “paraliza o calendarios de implantación das reválidas” eliminando os efectos académicos ate que se aprobe o “pacto pola educación” asinado entre “PP” e “Ciudadanos” ao que, agora, sumouse o “PSOE”. Consecuentemente con isto as reválidas de 3º e 6º de primaria e a de 4º da ESO continuarán facéndose, é certo que de momento de xeito “censal”, pero como ninguén sabe a que centro lle tocará a “lotería” da proba e todos necesitamos ter bos resultados, pois seremos obedientes e aplicaremos a LOMCE sen chistar, non vaia a ser o demo!

QUE É O QUE DEMANDA A MAIORÍA DA COMUNIDADE EDUCATIVA?:

ESIXIMOS que se cumpran as promesas electorais e SE DERROGUE INMEDIATAMENTE A LOMCE. Para iso non hai mais que restablecer a LOE coa redacción anterior a aprobación da LOMCE, recordaredes que a lei educativa vixente e a LOE.

ESIXIMOS que en todo o Estado se constitúan as mesas de traballo necesarias para que estean presentes a totalidade das organizacións que representan ao conxunto da comunidade educativa (docentes, alumnas/os, nais/pais, expertos, administración, partidos políticos, etc..,). Non queremos un “seudo” pacto pola educación entre os de sempre, e que ao final non se mude nada.

ESIXIMOS que esas mesas de traballo, na que todas/os estaremos representadas/os, e no tempo que sexa necesario, elaboren o tan desexado por todas/os MODELO EDUCATIVO DE CONSENSO.

 Consecuentes con todo isto, a FEDERACIÓN COMARCAL DE FERROLTERRA DE ANPAS DE CENTROS PÚBLICOS, fai un chamamento a todas as familias de TODAS AS ETAPAS EDUCATIVAS para que SECUNDEN A FOLGA e NON leven as súas filas e fillos a escola o día 9 de marzo, participando ademais nas mobilizacións convocadas.

 

NON a LOMCE !!

 

NON aos RECORTES !!

 

NOVA LEI EDUCACIÓN !!

 

 

 

 

- Directiva .-

 

 

CONCENTRACIÓN - NON A LOMCE NIN REVÁLIDAS .-

 

 



- MOBILIZACIÓNS -

 

 

- NON as REVÁLIDAS nin a LOMCE .-

 

    A Xunta Directiva de FEANPAS en reunión ordinaria celebrada o día 20 á tarde ao respecto das mobilizacións convocadas tanto pola PLATAFORMA GALEGA EN DEFENSA DO ENSINO PÚBLICO como polo SINDICATO DE ESTUDANTES, acordou:
 

     -- MANIFESTAR o apoio á folga do ENSINO EN SECUNDARIA convocada polo Sindicato de Estudantes e convidar a todas as familias a participar na MANIFESTACIÓN convocada polo SE na mañá do mércores día 26 de outubro.

     -- CONVOCAR a todas as familias á CONCENTRACIÓN que celebraremos a Plataforma Galega en Defensa do Ensino Público o mesmo mércores día 26 de outubro ás 19 horas fronte ao edificio administrativo da Xunta de Galicia en Ferrol.

     Como xa saberedes este ano remata a implantación da LOMCE no ensino, unha lei neoliberal que entende a educación como un negocio para uns poucos e entre outras moitas perversidades e anti-democráticas (segregación por sexo, liquidación dos consellos escolares, imposición da relixión como materia curricular, invasión de competencias propias das comunidades autónomas, etc...) utiliza as revalidas como medio para clasificar ao alumnado dende edades temperás e impedir á maioría chegar ás universidades

     Neste curso, ademais das revalidas de primaria, se celebrarán as reválidas de 4º da ESO e 2º de Bacharelato e, ademáis, se suprime a selectividade. O curso xa comezou e o Goberno Galego aínda non impartiu instrucións sobre a problemática reválida de 2º de bacharelato, polo que @s alumn@s que pretendan acceder a universidade o próximo curso aínda non teñen nin idea da materia obxecto de exame, nin tipo de exame que terán que superar para acceder á universidade, nin se terán un único exame para todas as universidades ou non. Un absoluto despropósito que produce unha ansiedade terrible no alumnado nun curso trascendental para o seu futuro.

 

 

   

 

  A FEANPAS loita contra a LOMCE dende que esta perversa lei era un mero proxecto, e continuará loitando ate conseguir a súa completa DERROGACIÓN, non so as revalidas, se non toda a lei. Por iso vos pedimos a máxima difusión deste correo e o máximo apoio posible ás mobilizacións do día 26.

 

   

 

 

 

  
    

 

                           NIN LOMCE !!!        NIN REVÁLIDAS !!!

 

     Un saúdo

 

 

 

A DIRECCIÓN DO CEIP RECIMIL SOLICITA UNHA RECTIFICACIÓN PUBLICA DO DIRECTOR XERAL DE CENTROS.

A dirección do CEIP Recimil ven de difundir o comunicado que reproducimos de seguido. Esta ANPA tamén exixe a rectificación dos falsos argumentos expostos polo Director Xeral ós que se refire este comunicado, ós que engadimos os falsos motivos da dimisión da anterior xunta directiva desta ANPA: as verdadeiras razóns poden consultarse neste blog.

"Agradecería a difusión da seguinte información:

A Dirección do Ceip Recimil quere DESMENTIR publicamente as palabras do Director Xeral de Centros e Recursos Humanos como resposta á pregunta plantexada polo BNG na Comisión do Parlamento 4ª de Educación e Cultura do día 12/11/2015 ás 16:12 horas.

Neste Centro e ata este curso escolar 2015/2016 contábamos con 6 titores e dous profesores de apoio na etapa de educación infantil. Neste curso vémonos obrigados a unir dúas unidades xa que non se cubren dúas prazas provisionais, unha por xubilación e outra en comisión de servizos quedando entón 5 titores e 1 profesor de apoio.

O Sr Director Xeral, en dúas ocasións afirma que o Centro conta con 7 profesores en educación infantil, cando en realidade temos 6.

Afirma igualmente que a Dirección concordou en conxunto coa Administración a supresión dunha unidade en educación infantil sendo isto totalmente incerto xa que a Dirección en ningún momento estivo nin está de acordo con esa decisión aínda que acata a decisión da Administración e organiza a etapa de infantil con eses 6 profesores quedando da seguinte maneira: 3 anos con 22 alumnos, 4 anos A con 13, 4 anos B con 12, 5 anos A con 20 e 5 anos B con 18 alumnos.

Esta Dirección, desminte igualmente, que o Claustro de profesores apoiara a decisión da Administración cando o que este apoiou por unanimidade foi a xestión feita pola Dirección cos recursos dispoñibles.

Solicitamos do Director Xeral unha rectificación pública da información dada na Comisión do Parlamento 4ª de Educación e Cultura do día 12/11/2015.

O EQUIPO DIRECTIVO"

Xoves 12 de xuño ás 16:30 horas, concentración diante da sede do Consello Escolar de Galiza (Rúa San Roque, 2, Santiago de Compostela)

A Plataforma Galega en defensa do Ensino Público, da que esta ANPA forma parte , ten convocada una concentración para esixir a non aplicación da LOMCE

Este é o comunicado de prensa: 

PLATAFORMA GALEGA EN DEFENSA DO ENSINO PÚBLICO 


A Plataforma Galega en Defensa do Ensino Público convoca
unha concentración diante da sede do Consello Escolar de
Galiza para reclamar a paralización dos currículos da LOMCE


A Plataforma Galega en Defensa do Ensino Público convoca este xoves
12 de xuño unha concentración diante da sede do Consello Escolar de
Galiza, ás 16:30 h.


Ese día está prevista a reunión do Consello para tratar o currículo da FP Básica
que o Goberno prevé implantar o vindeiro curso escolar. A Plataforma
concéntrase para expresar a súa oposición á LOMCE e esixir a paralización da
súa aplicación, en concreto dos currículos das etapas que pretenden que
entren en vigor o vindeiro curso escolar: FP Básica e primaria, pois estamos
ante uns currículos baseados en principios mercantilistas e academicistas, que
se afastan da nosa realidade cultural e histórica, impregnados de ideoloxía
neoliberal, dos que se desterra a educación en valores, se profunda na
confesionalidade do ensino e se pretende ateigar o alumnado de contidos
inalcanzábeis.

Desde a Plataforma Galega en defensa do Ensino Público valoramos que a
Consellaría está actuando con precipitación e improvisación, para pregarse aos
ditados do Goberno central. A Plataforma Galega que demanda que non se
aplique a LOMCE en Galiza, considera que nas datas actuais só cabe o
adiamento destes proxectos de decreto, pois moi dificilmente van estar
preparados para seren utilizados polo profesorado no inicio do curso, momento
en que teñen que elaborar as programacións.

A Plataforma Galega en Defensa do Ensino Público está integrada pola AS-PG,
CIG-Ensino, Comités, Liga Estudantil Galega, Federación Provincial de ANPA
de Lugo (FAPACEL), Federación de ANPA de Compostela, Federación de
ANPA da Costa da Morte, a Federación de ANPA de Ferrolterra (FEANPAS),
Movemento Dezao en Defensa do Ensino Público, Agir, Sindicato de
Estudantes, BNG, Galiza Nova e a Federación de ANPA de Ponteareas
(FANPO).

Santiago de Compostela, 11 de xuño de 2014

cartaz acto día 13 by anparecimil

MANIFESTACIÓN CONTRA A LOMCE  24/10/2013  

As dúas plataformas marcharán xuntas o vindeiro xoves contra a Lomce do PP - Ferrol - Diario de Ferrol

As dúas plataformas marcharán xuntas o vindeiro xoves contra a Lomce do PP - Ferrol - Diario de Ferrol

FOLGA CONTRA A LOMCE - XOVES 24 OUTUBRO

MANIFESTACIÓN 11:30 PRAZA DE ESPAÑA

Comunicado convocando á folga 24-10-13 by anparecimil

MARCHA CONTRA A LOMCE

Anímamosvos a acudir o vindeiro sábado, 28 de setembro, á marcha contra a LOMCE convocada pola Plataforma Galega en defensa do ensino público que terá lugar en Compostela. 

HORARIO DE AUTOBUSES (Ferrol):

Saída: 9,00 a.m  (Avenida de Esteiro)

Prezo: 5 euros.

Tfno. Contacto: 98135750 (cig ensino)

Sairase a pé dende o Polígono do Tambre (Compostela) ás 10,30 a.m. en dirección ao centro da cidade.

Adxuntamos un enlace a un video dos compañeiros e amigos das ANPAS da costa da Morte animando e xustificando a presenza de todas e todos os que defendemos o ensino público.

http://www.youtube.com/watch?v=odG6DIs4TV0

MARCHA A SANTIAGO CONTRA A LOMCE

MARCHA A SANTIAGO CONTRA A LOMCE 

SÁBADO 28 DE SETEMBRO 

Preme aquí para máis información

Ahí estamos nós tamén

* CARGA DE DIGNIDADE*

 Informámosvos de que este* domingo día 2 de xuño de 11:00 a 14:00 h*, na  porta do Asteleiro ,terá lugar un acto reivindicativo de Apoio ó Sector Naval. Está convocado por artistas e creadores agrupados en* Radio* *Buguina*.

Fan un chamamento a toda a poboación para facer un monumento á Dignidade con pezas de roupa ( camisolas, buzos, traxes, roupas de nenos...) Haberá música e radio en vivo!!!

Dende a nosa Anpa fixemos unha pancarta de apoio que está pendurada na entrada principal do cole.

 PARTICIPACIÓN DA NOSA ANPA  NAS MANIFESTACIÓNS DO 9 DE MAIO

                                                          

Nen@s, pais, nais, avós e avoas apoiando a folga xeral de educación pola retirada do nefasto proxecto LOMCE. 

                   Pola mañá...

                 E pola tarde ...

 ANPA CEIP RECIMIL                                                

                           

               FOLGA XERAL  XOVES 9 DE MAIO

 ""  Conxunta por 1ª vez na historia entre o profesorado, familias e alumnado ""

 A EDUCACIÓN ...na súa 7ª reforma lexislativa

-  Nace sen consenso

-  Diminúen os contidos de ética, responsabilidade social e cidadanía.

-  Dificulta a intervención nas aulas con diversidade, especialmente se a rátio do alumnado é maior.

-  Deixa ao Consello escolar como un órgano consultivo (agora é de debate e de goberno por parte das familias, profesorado e ANPA, no que se aproba o orzamento, a programación, a propia elección de director/a, admisión  de alumnado...)

-  Aumenta a inestabilidade laboral do profesorado, rebaixa os seus dereitos e autonomía, desmotivándoo na educación dos nosos fillos/as e obrigándoo a impartir materias que non son da súa especialidade.

-  Discrimina o alumnado con menos recursos económicos.

-  Exclúe por colectivos, etnias, clase social, centros e segrega mediante os mecanismos de reválidas.

-  Deixa á Comunidade Autónoma sen capacidade para establecer contidos obrigatorios, que veñen marcados polo goberno central.

-  Promove ao alumnado con altas capacidades relegando a aqueles/as que non as posúen a un segundo plano.

-  Agudiza as diferenzas entre o alumnado pola capacidade económica das súas familias e o seu “éxito académico”.

-  Promove a contratación de avaliacións privadas de carácter estatal do rendemento do alumnado e do centro, fomentando a competitividade.

-  Entende a educación xeral e obrigatoria coma unha ferramenta do mercado e non coma un xeito de formar persoas, dándolles acceso  á  cultura.

Invitámosvos a participar activamente a través das 

concentracións que terán lugar en Ferrol:

O XOVES 9 ás 11:30 diante do edificio administrativo da Xunta de Galicia, convocada pola Plataforma Galega en Defensa do Ensino Público.

O XOVES 9 ás 19:30 diante do edificio administrativo da Xunta de Galicia , convocada pola Plataforma en Defensa do Ensino Público.

PROXECTO DO DECRETO SOBRE OS COMEDORES ESCOLARES.

Este é o comunicado de prensa que a Federación de A.N.P.As de Centros Públicos de Ferrolterra enviou á prensa, con respecto ás modificaciones no funcionamiento dos comedores escolares  para o vindeiro curso. Veredes o rexeitamento tanto ao que vai ser un empeoramiento da calidade do servicio, como á supresión da gratuidade para os usuarios do transporte escolar. 

PECHES CONTRA A LOMCE

      No mesmo comunicado infórmase da convocatoria de peches contra a LOMCE convocadas pola Plataforma Galega en Defensa do Ensino Público.    
O peche en Ferrol será o xoves 11 de abril entre ás 17:00 e ás 10:00 no CIF Ferrolterra (antiguo IES Marqués de Suanzes)

MANIFESTO CONTRA A LOMCE

Adxuntamos o manifesto que acompañará ás mobilizacións convocadas en toda Galicia para o 31 de xaneiro. Convoca a Plataforma Galega en Defensa do Ensino Público, da que como sabedes, formamos parte. Apoiamos por tanto estás mobilizacións pola retirada da LOMCE e animámosvos a participar. 

20130128 MANIFESTO CONCENTRACIÓNS 31 XANEIRO by

CONVOCATORIA DE MOBILIZACIÓN CONTRA A LOMCE

Cartaz Plataforma 31 de Xaneiro by

STOP LEY WERT
Interesante entrevista co pedagogo FRANCESCO TONUCCI 






O colectivo CIUDADAN@S POR LA EDUCACIÓN PÚBLICA, do que xa temos falado neste blogue, está a recoller firmas contra a LOMCE. Preme aquí abaixo para deixar a túa.

FIRMA CONTRA A LEY WERT